တစ်ကျော့ပြန် ပြန်လည်ဖြစ်ပွားလာသော မျောက်ကျောက်ရောဂါ
မျောက်ကျောက်ရောဂါကို ကမ္ဘာလုံးဆိုင်ရာ ကျန်းမာရေး အရေးပေါ်အခြေအနေအဖြစ် WHO ကကြေညာ ထားပါသည်။ ၂၀၂၂ ခုနှစ်မှာ အရေးပေါ်အခြေအနေအဖြစ်ကြေညာခဲ့ပြီး ၂၀၂၄ ခုနှစ် ဩဂုတ်လ ၁၄ ရက်နေ့တွင် ကြေညာမှုသည် ဒုတိယအကြိမ်ဖြစ်ပါသည်။
အာဖရိကတိုက်တွင် မျောက်ကျောက်ရောဂါ တစ်ကျော့ပြန်ခေါင်းထောင်လာသောကြောင့် WHO က ပြည်သူ့ ကျန်းမာရေး 
အရေးပေါ်အခြေအနေအဖြစ်ကြေညာလိုက်ခြင်းဖြစ်ပါသည်။
မျောက်ကျောက်ရောဂါသည် ကွန်ဂိုနိုင်ငံတွင်စတင်ခေါင်းထောင်လာပြီး အိမ်နီးချင်းနိုင်ငံများဆီသို့ စတင်ပျံ့နှံ့ ကူးစက်လာကြောင်း အာဖရိကရောဂါတားဆီးထိန်းချုပ်ရေးဌာန CDC ကထုတ်ပြန်ထားပါသည်။ နိုင်ငံတိုင်း မျောက်ကျောက်ရောဂါကို ဖိဖိစီးစီးဖြင့်ကာကွယ်သင့်ကြောင်း CDC ကဆိုထားပါသည်။
ရောဂါလက္ခဏာများမှာ တုပ်ကွေးကဲ့သို့ရောဂါလက္ခဏာများပြသတတ်ပြီး မျက်နှာ၊ လက်၊ ခြေ၊ ပါးစပ်နှင့် လိင်အင်္ဂါများတွင် အနီကွက်များနှင့်အတူ အရည်ကြည်ဖုများပေါက်ခြင်း၊ ဖျားခြင်း၊ ပြန်ရည်အိတ် (Lymph node) များ ရောင်ရမ်းခြင်း၊ ခေါင်းကိုက်ခြင်း၊ ကြွက်သားနှင့် နောက်ကျောနာကျင်ကိုက်ခဲခြင်း၊ အားအင်ကုန်ခန်းခြင်း တို့ဖြစ်ပါသည်။ တစ်ပတ်ကြာလျှင်ရောဂါသက်သာလေ့ရှိပြီး အထူးသဖြင့်ကလေးများ၊ ကိုယ်ဝန်ဆောင်မိခင်များ၊ ကိုယ်ခံအားနည်းသောသူများ၊ရောဂါအခံရှိသူများမှာ ပြင်းထန်သော အခြေအနေများတွင် အသက်အန္တရာယ်ကို ထိခိုက်စေနိုင်ပါသည်။
မျောက်များတွင်စတင်တွေ့ရှိသောရောဂါဖြစ်ခြင်းကြောင့် မျောက်ကျောက် (Monkey Pox) ဟုခေါ်ဆိုခြင်းဖြစ် ပြီး နောက်ပိုင်းတွင် လူမျိုးရေးခွဲခြားမှုဆိုင်ရာအငြင်းပွါးမှုများကိုရှောင်လွှဲနိုင်ရန်အတွက် WHO က Monkey Pox နာမည်အစား Mpox ဟုပြောင်းလဲခေါ်ဆိုစေခြင်းဖြစ်ပါသည်။ Mpox ရောဂါအမျိုးအစားနှစ်မျိုးရှိပြီး Clade 1 နှင့် Clade 2 ဖြစ်ပါသည်။ ၂၀၂၂ခုနှစ်တွင် ကြေညာခဲ့သော Mpox သည် Clade2 အပျော့စား ရောဂါအမျိုးအစားဖြစ် ပါသည်။ ၂၀၂၄ ခုနှစ်တွင် တစ်ကျော့ပြန်ဖြစ်လာသော Mpox သည် Clade1 အမျိုးအစားဖြစ်ပြီး ပိုမိုပြင်းထန် ကြောင်းနှင့် ကူးစက်မှုလည်းမြန်ဆန်ကြောင်းဖော်ပြထားပါသည်။
မျောက်ကျောက်ရောဂါကူးစက်နိုင်သောနည်းလမ်များမှာ ရောဂါပိုးရှိသောသူနှင့်ထိတွေ့ဆက်ဆံခြင်း၊ ရောဂါပိုး ရှိသောတိရစ္ဆာန်မှတစ်ဆင့်ကူးစက်ခြင်းတို့ဖြစ်ပါသည်။
မျောက်ကျောက်ရောဂါသည် မျိုဗီဇပြောင်းလဲမှုဖြစ်ပေါ်နေသည့်အတွက် ရောဂါဆိုင်ရာအချက်အလက်များမှာ ပြောင်းလဲနေမည်ဖြစ်သောကြောင့် အချိန်နှင့်တစ်ပြေးညီ သိရှိနိုင်ရန်အတွက် စောင့်ကြည့်သင့်ကြောင်း CDC က ဆိုထားပါသည်။
Sources by; WHO, CDC,
“လူသားအားလုံးကျန်းမာစေချင်သည်ဗဟိုရ်စည်”
Phone 01-2300502 to 01-2300530 / Ext: 4001, 4002, 4010
Email: bahosihospital@gmail.com
Web Mail: bahosihospital@bahosihospital.com
Website: www.bahosihospital.com
အမှတ် (၁-၆)၊ (၃၁-၃၆)၊ (၃၇-၃၈)၊ ဗဟိုရ်စည်အိမ်ရာ၊ ဝါးတန်းလမ်းနှင့် ဗိုလ်ချုပ်အောင်ဆန်းလမ်းထောင့်၊ လမ်းမတော်မြို့နယ်၊ ရန်ကုန်။